“A CABEZA NON PARA”
Exposición dalgúns dos mellores debuxos de Xosé Manuel nestes últimos 12 anos na Casa da Cultura de Monforte (do 1 ao 14 de xuño do 2012).
PRESENTACIÓN DO AUTOR
Eu son un deses personaxes que corre polo mundo; o de
correr é un dicir, máis ben ando. Pois iso, ando polo mundo… distraído e
disperso, ou como diría a miña nai: “nas berzas e soñeando”.
Nos momentos de evasión onírica en tempo real dáme por
buscar o lado cómico das situacións e por xogar coas palabras, é algo xa
enfermizo, que lle vou facer... Se investise ese tempo en estudar para notario
igual o meu patrimonio o “notaría”, pero non me deu por aí. Como sabedes, todo
galego humorista que se prece xoga cos dobres e os triples sentidos, aínda que
na maioría dos casos o que prima de verdade é o “sen sentido”, o surrealismo e
o rir por rir.
Ao marxe do anterior, e nos momentos de lucidez (que os
hai, non vaiades pensar... que para pensar xa estou eu), cos meus debuxos fago
unha importante labor social dándolle unha lectura reinterpretativa á realidade
que nos amosan, moitas das veces encuberta e orballada. Por iso coido que
cómpre desenmascarala coa axuda desa ferramenta tan galega, a retranca, enxebre
ironía que nos permite reinterpretar con humor as realidades do día a día. “Ás
veces a realidade é tan dura que cómpre facela entrar coa axuda dunha vaselina
chamada humor”.
Confórmome con facer chegar ao lector unha mensaxe ou un
simple sorriso, que non é pouco.
Xosé Manuel Fernández
Montes
No hay comentarios:
Publicar un comentario